2 Kings 7
1 以利沙講：「你等愛聽上主所講个話！上主講這好消息：天光日這個時，在撒馬利亞城門口，小麥三公斤只有賣一隻銀幣，大麥六公斤只有賣一隻銀幣。」
2 扶等王个軍長對神人講：「該係無可能个事。就係上主黏時打開天窗，乜無可能！」以利沙應佢講：「你一定會親眼看到這事發生；總係你麼介乜食毋到。」
3 在撒馬利亞城門外，有四個發癩个人；佢等大家交談講：「𠊎等做麼介坐在這位等死呢？
4 𠊎等到城肚去，城肚有飢荒，𠊎等會在該位餓死；𠊎等坐在這位，也係等死。𠊎等來去向敘利亞軍隊投降，無一定佢等會給𠊎等一條生路；佢等若係愛㓾𠊎等，就被佢等㓾好了。」
5 所以佢等在臨暗仔个時去敘利亞兵營。佢等行到營堘，總係無看到半個人。
6 原來主已經使敘利亞軍隊聽到大隊兵馬㧯戰車个聲音；佢等傳講：「以色列王買通赫人㧯埃及人該兜王來攻打𠊎等！」
7 所以該日臨暗仔，敘利亞人全部逃命走淨淨，佢等个帳篷、馬、驢全部無帶走；佢等个兵營還係留在原位。
8 該四個發癩个行到營地，入去帳篷，在該位又食又啉；佢等看到金仔、銀仔、㧯衫褲就拿去囥起來，然後又入去另外一座帳篷，再做共樣个事。
9 後來佢等彼此講：「𠊎等無應該恁樣做；𠊎等有好消息，做毋得毋㧯人講。若係𠊎等等到天光朝晨正講，𠊎等一定會受到刑罰。𠊎等這下就去㧯王个官員講！」
10 所以佢等轉到撒馬利亞，向掌城門个人喊講：「𠊎等去過敘利亞兵營，無看到半個人，也聽毋到人聲。馬㧯驢全部還紽等，帳篷也還留在原位。」
11 掌門个喊起來，又將消息傳到王宮。
12 總係王在半夜䟘起來，就對佢个官員講：「𠊎㧯你等講，這係敘利亞人个陰謀！佢等知𠊎等這位做飢荒、會餓死，所以佻佻離開兵營，埋伏在田野；愛等𠊎等出城尋食物，該時就做得將𠊎等生生捉起來，好佔領這城。」
13 王个一個官員應講：「就像該兜死掉个人共樣，城肚所賸个人民早慢會餓死淨淨。所以，樣毋喊幾個人，騎五隻賸到个馬，去查看到底係麼介事情。」
14 所以，佢等選出幾個人來。王派這兜人坐兩輛戰車㧯馬，指示佢等去探敘利亞軍隊个實際情形。
15 這兜人一直追到約旦河，透路看到敘利亞人逃走時㧒掉个衫㧯武器，佢等就轉去報告王。
16 撒馬利亞个人民遽遽出城去，搶敘利亞人个兵營。這時，就像上主講過个：小麥三公斤只有賣一隻銀幣，大麥六公斤只有賣一隻銀幣。
17 在這以前，以色列王有派扶等佢个軍長到城門口指揮，這軍長反轉被人群踏死在該位，就像神人以利沙在王去看佢該時所預言个。
18 神人識對王講：「天光日這個時，在撒馬利亞城門口，小麥三公斤只有賣一隻銀幣，大麥六公斤只有賣一隻銀幣。」
19 扶等王个軍長當時有對神人講：「該係無可能个事。就係上主黏時打開天窗，乜無可能！」以利沙應佢講：「你一定會親眼看到這事發生，總係你麼介乜食毋到。」
20 這話果然應驗，因為佢被城門口个人群踏死掉。